BANGA, Aklan—Napas-eawan ro sangka diver maghalin sa banwa it Buruanga nga makit-an ro eawas ni Jhuros Flores.
Nagvolunteer si Cris Samson Cabangon nga magsisid sa Aklan river sa tuyo nga makabulig sa pamilya nga nagahueat sa pagbalik it binatilyo.
Apang, napas-eawan raya sa anang katuyuan bangud sa nakaabot imaw sa madaeom nga porsyon it suba nga nagalilo nga mas delikado para kana kon padayunon pa nana ro pag-eonip.
Haeos daywang adlaw imaw nga nagvolunteer nga mag-eonip agud nga makabulig nga makit-an ro eawas it grade 10 student.
Ginapanan-aw kara nga may posibilidad nga dikato sa buho nga inde nana maabot si Jhuros nga kapin sa an-om nga dupa halin sa ibabaw.
Sa anang eksperyensya, kon makasueod dikato sa lilo nga paadto sa buho ro eawas it sangka tawo hay may posibilidad nga inde eon raya kabutwa pa.
Nasayuran nga kapin sa sang dominggo eon nga uwa makit-an ro eawas ni Jhuros halin kat ginapahayag nga naeomos raya ko Enero 29, 2025 sa nasambit nga suba nga sakop it Brgy. Polo, Banga.
