KALIBO, Aklan—Ginakabaeak-an makaron it mga residente ro uman nga pagkasamad it porsyon it seawall kasunod it pagbubu it mabaskog nga uean tuga it bagyong Agaton sa Brgy. Tambak, New Washington.
Suno kay Mary Jane Carillo, residente it nasambit nga lugar nga grabeng nerbyos ag kueba ro andang nabatyagan kada naga-uean.
Raya hay bangud nga haeos masami eon nga nagakarumpag ro posyon it seawall kada nagataas ro humbak sa baybay.
Nagaeaum sigon sanda nga mataw-an it insigida nga pag-aksyon it mga natungdan nga ahensya it gobyerno ro andang problema agud nga mabawasan ro andang pagkabaeaka eabi eon sa tyempo it kalamidad.
Sa pihak nga parte, ginpaathag ni Punong Barangay Lucille Macario nga masyado eon nga delikado para sa mga residente nga naka-istar maeapit sa nasambit nga lugar ro presenteng sitwasyon.
Abril 8 suno kana kat amat-amat nga nakaangkon it kasamaran ro flooring it seawall nga ginapatihan nga naghumok bangud sa sigidas nga pag-uean.
Ginpahayag ni Macario nga insigida imaw nga nagreport sa Municipal Engineering Office para makahimo it nagakaigo nga aksyon.
Sa mayad nga swerte suno kana hay madasig nga gin-aksyunan it Department of Public Works and Highways (DPWH)-Aklan ro lugar kung siin ginbutangan it cordon ro palibot it nasamad nga seawall.
Samtang, ginpakamayad sigon nanda nga abisuhan ro mga residente nga insigidang magbakwit engkaso nga makaangkon it pagtaas sa humbak it baybayon agud nga makalikaw sa anumang peligro.
