KALIBO, Aklan – – – Naga himas it rehas ro sangka 19-anyos nga security guard matapos nga magpanutok ag magpaeopok it baril sa andang barracks sa brgy. Balabag, Boracay.
Kasong pag-eabag sa Republic Act 10591 ukon illegal possession of firearms and ammunition ro suspek nga nakilaea kay Ruben Miguel ag residente it Libertad, Antique matapos nga magpanutok ag magpaeopok it shotgun sa tagreklamong si Wennell Inguillo, 20-anyos ag residente it Dumarao, Capiz.
Base sa inisyal nga imbestigasyon it Boracay Tourist Assistance Center (BTAC), sa idaeom it impluwensya it makahi-eilong nga ilimnon ro suspek kat natabo ro insidente tuga it stress ag depress dahilan sa sunod-sunod nga duty sa trabaho bangud sa uwa it karelyibo.
Owa sigon nakauli ag nakapahuway ku adlaw it paskwa ro suspek rason nga napinsaran kara ro insidente.
Nakataeana man nga i-inquest si Miguel makaron nga adlaw agud bangud sa kasong gina pangatubang.
