KALIBO, Aklan—Ginplantsa eon it Aklan Police Provincial Office (APPO) ro igapatuman nga security measures para sa “Ligtas Paskuhan” 2020 nga may pagsunod sa health and safety protocols.
Suno kay Police Staff Sergaent Jane Vega, Public Informational Officer it APPO raya hay bilang preparasyon eon man sa nagahilapit nga Simbang Gabi agud nga masigurong euwas ag nagasunod ro tanan sa mga ginpatpat nga polisiya it gobyerno.
Ginapahayag nga indi magiging sab-eag sa mga kapulisan ro pandemya para gampananm ro andang obligasyon nga protektahan ro publiko eabi eon makaron nga tyempo it Paskwa.
Partikular nga pagatutukan it mga otoridad ro mga ginatawag nga places of convergence kapareho it tindahan, malls, paeuparan, pantalan, mga terminal ag eabaw sa tanan hay ro mga simbahan makaron nga maga-umpisa eon ro tradisyunal nga Simbang Gabi.
Nakaplastar eon man suno kana ro andang igapatuman nga deployment plan para sa “Ligtas Paskuhan” 2020.
Sa pihak nga parte, ginkumpirma man ni Police Staff Sergaent Jane Vega, Public Informational Officer it APPO nga may igapatigayun nga raffle ro Aklan Police Provincial Office makaron nga tyempo it kapaskwahan.
Raya sigon hay sandig sa inisyatibo it Provincial Director matapos nga imando it Chief PNP nga bawaeon anay ro mga Christmas party makaron nga dag-on bangud sa nagapadayun nga paeag it Coronavirus Disease 2019 ukon COVID-19.
Ginpahayag dugang nga nag-aeamutan sigon ro tanan nga miyembro it kapulisan sa Aklan agud makabakae it mga appliances ag iba pang papremyo.
Ro nasambit nga raffle hay pagahimuon online.
