KALIBO, Aklan—Bilang pagpahaum sa selebrasyon it “pagkinalipay sa baybay 2023” sa banwa it New Washington kadungan sa pagdumdum sa kapistahan ni San Juan de Bautista, nakaplastar eon ro security plan it kapulisan.
Suno kay Police Executive Master Sergeant Joseph Agnate, deputy chief of police it New Washington Municipal Police Station nga tuyo it andang security plan nga mabantayan ro seguridad it mga residente ag mga naga-excursion.
Umpisa sa Hunyo 23 hay may igapakalhit eon sigon sanda nga mga tawuhan kaeakip ro augmentation team halin sa Aklan Police Provincial Office ukon APPO ag iba pang natungdan nga ahensiya it gobyerno agud nga magbantay sa pagahiwaton nga aktibidad nga ginpahaum it lokal nga gobyerno.
Dugang pa kara nga ro security plan hay igapatuman kabulig ro mga barangay officials ag New Washington auxilliary police.
Kadungan kara, gin engganyo ni PEMS Agnate ro mga pumueuyu nga makipagbueuligan ag magsunod sa mga patakaran eabi eon ro pagdaea it mga makamaeatay nga hinganiban ag debotelyang ilimnon agud nga maging maayos ag owa it matabu nga gulo.
Samtang, sa Hunyo 25 sa kaadlawan it kapistahan hay ginaeauman ro pagbuhos it mga naga excursion nga magasaksi sa uman nga pagbalik it mga aktibidad kapareho it karera it mga baroto sa barangay Tambak sa nasambit nga lugar.
Mag-eowas sa mga baybayon, ginaeauman ro pagbuhos it mga bisita sa mga kasubaan ag mga resorts nga may swimming pool.
