KALIBO, Aklan—Ginpaabot it Aklan Police Provincial Office ukon APPO nga kasado eon ro andang security plan agud nga masiguro ro kaeowasan ag seguridad sa nagahilapit nga Semana Santa ag 2025 Summer Vacation ukon SUMVAC Season.
Suno kay P/Capt Aubrey Ayon, tagapaghambae it APPO nga preparado eon sigon sanda sa implementation ag hightened security measures para sa Ligtas SUMVAC 2025, mag-eowas pa sa andang mga kapulisan nga igapakalhit para sa seguridad it publiko makaron nga summer season.
Magiging kabulig sigon nanda ro force multifliers halin sa Armed Forces of the Philippines, Bureau of Fire Protection, Philippine Coast Guard, ag iba pang ahensya it gobyerno ag Barangay Peace Keeping Action Team ukon BPAT.
Ginaeauman sigon nanda ro pagdagsa it mga bakasyunista bangud sa sunod-sunod nga seasonal events kapareho it Holy Week, mga kapistahan ag iba pa.
Agud nga masiguro ro peace and order, gintumod eon nanda ro kapin sa 22 nga mga simbahan nga kinahangean nga pabaskugon ro security measures sa maabot nga semana santa sa bilog nga aklan ag iba pang pilgrim sites nga pagahiwatan it nagkaeian-eain nga mga religious event.
Masobra sa 41 man nga mga resorts sa mainland aklan ag iba pang pampublikong lugar ro pagatutukan mag-eowas sa isla it Boracay nga sangka major tourist destination.
Sa pihak nga parte, may igapakalhit man sigon nga mga traffic marshals, ag route security para sa ginaeauman nga pagdagsa it mga saeakyan, transportation hubs ag terminal nga magasirbing transit points it mga nagabiyahe.
Pagabantayan man ro mga commercial areas, kaibahan ro mga mall, baealigyaan ag iba pa.
Apela nana sa publiko nga maging alerto ag ireport ro mga tawong may makadueuda nga hueag ag insigidang makipag-angot sa mga awtoridad.
