KALIBO, Aklan—Agud nga mabaeabagan ro mga owa ginaeauman nga hitabu, kasado eon ro security preparations it kapulisan para sa selebrasyon it kaugalingon nga bersyon it Ati-Atihan Festival sa banwa it Makato.
Suno kay P/Lt. Merrifin Carisusa, hepe it Makato Municipal Police Station nga kasado eon ro andang pagpahaum para sa tanan nga mga aktibidad nga may kaangtanan sa sang domingo nga kasadyahan eabi eon sa highlight sa Enero 14 ag 15.
Bangud nga kadungan raya sa Ati-Atihan Festival it Kalibo, ro sadsad contest hay iga-advance nanda sa Biyernes, Enero 13.
Kadungan kara, magapaguwa it executive order si mayor Ramon Anselmo Martin “Mon-Mon” Legaspi III angot sa do’s and don’ts sa sueod it festival zone.
Sambilog kara hay ro pagbawae sa pagdaea it backpack, apang pwede ro mga transparent nga bag, bawae man ro baril, mataeum nga hinganiban, pagpanigarilyo ag debotelyang ilimnon mag-eowas sa food court.
Sa pihak nga parte, ginkumpirma ni Lt. Carisusa nga may daywang team halin sa Police Regional Office ukon PRO-6 ro iga-augment sa banwa it makato nga maga-abot sa Enero 8 nga may kapin sa 16 nga police personnel.
Sa bisperas ag kaadlawan it kapistahan, magapatigayon it re-routing scheme, kun sa siin iga-detour ro mga saeakyan sa diversion road.
Gin-engganyo man ni Carisusa ro publiko nga magsuksok sa gihapon it facemask eabi pa ag ginaeauman ro pagdagsa it mga deboto ag bisita.
