NATIONAL News — Indi pagakunsintihon it Malakanyang ro “seditious acts” nga ginhimo ni Patrolman Francis Steve Tallion Fontillas kun sa siin gingamit kara ro social media para kuwestiyunon ro pag-aresto kay dating Pangueong Rodrigo Duterte kadungan it pagbatikos sa pagdumaea it Philippine National Police (PNP) sa idaeum it presenteng administrasyon.
Gin-engganyo man kara ro kaparehong pulis nga mag-alsa kontra sa gobyerno.
Suno kay Palace Press Officer ag Presidential Communications Office Undersecretary Claire Castro sa press briefing sa Malakanyang nga klaru nga nag-eabag sa laye si Fontillas.
Gindepensahan sigon ni Fontillas si dating Pangueong Duterte sa alegasyon nga crimes against humanity nga may kaangtanan sa drug war killings ag naghambae nga si Pangueong Ferdinand Marcos Jr. hay owa nakabo-oe it kaparehong pagrespeto halin sa mga tawo kumpara kay Duterte.
Nauna kara, ginkasuhan eon it Quezon City Police District ro nasambit nga pulis.
Dati imaw nga naka-assign sa District Personnel and Holding Admin Section antes nga nag-AWOL ko Marso 6.
Inciting to sedition ukon pageabag sa article 142 it revised penal code, in relation to Cybercrime Prevention Act of 2012 ro ginpasaka it PNP kontra kay Fontillas bangud sa gina-alegar nga partisan post kara sa anang Facebook page.
Samtang, uman nga nagpadumdum ro QCPD sa mga pulis nga dapat non-partisan ukon owa it ginadampigan ukon ginapaboran nga grupo ukon tawo ro tanan nga mga miyembro it kapulisan ag likawan nga magpost it mga biased contents sa andang mga social media platforms.
