KALIBO, Aklan—Mas pang ginhugtan ro seguridad nga ginapatuman sa mga sementeryo sa banwa it kalibo bangud sa amat-amat nga pag-abu it mga tawo nga gustong makabisita sa panchon it andang mga mahae sa kabuhi antes raya nga igasarado sa Oktubre 29 hatsa Nobyembre 4.
Suno kay Patrolman Arnie Palabasan it Kalibo PNP nga naka-assign sa Medalla Milagrosa Cemetery nga hugut nanda nga ginapatuman ro “no facemask, no faceshield , no entry policy” agud nga makalikaw sa COVID-19.
Ginabawae man ro pagdaea it mga mataeum nga bagay, aeak, inflammable materials, ag mga unga sa mga sementeryo.
Gina-limitahan man sigon ro pagsueod it mga tawo agud nga ma-obserba ro physical distancing.
Ginpahayag kara nga temporaryo nanda nga ginasaraduhan ro gate kon mataeupangdan nga abu eon ro tawo sa sueod.
Sangka ama sigon ro andang nasita matapos nga gindaea nana ro anang unga.
Samtang, agud nga malikawan ro paggutok it trapiko pasueod sa sementeryo hay nagtaeana sanda it one entry, one exit nga patakaran.
Nauna eon nga nagpaguwa it abiso ro mga natungdan nga indi pag obrahon nga last minute ro pagbisita sa mga mahae sa kabuhi nga nagtaliwan eon bangud nga basi nga indi sanda makasueod sa mga sementeryo.
Nasayuran nga base sa executive order nga ginpaguwa ni mayor emerson lachica, igasarado ro gate it mga sementeryo umpisa huwebes nga adlaw, Oktubre 29 hasta Nobyembre 4.
