KALIBO, AKLAN— All set eon ro seguridad nga ginpreparar it pulisya ag militar para masiguro ro kaeowasan it tanan sa selebrasyon it Kalibo Sto. Niño Ati-atihan Festival 2019 nga ginakabig man nga “Mother of All Philippine Festival.
Suno kay PSSupt. Remos Zacharias Caneso, Deputy Regional Director for Operation it Police Regional Office (PRO) 6, target makaron it kapulisan nga maging ‘zero major crime incidents’ ro nasambitang selebrasyon rason nga magapakalhit it masobra sa 1, 506 nga mga pulis agud nga masiguro ro kaeowasan it mga bisita nga makisadya sa festival.
Magabutang man it mga police assistance desk sa mga matawong lugar ag sa entry ag exit point it probinsya.
Samtang, nakahathat eon ro traffic management ag re-routing schemes kamana man emergency lanes agud mapadali ro pagresponde it mga emergency team engkasong pagakinahang-eanon.
Preparado eon man sigon ro mga igadisignar nga kapulisan sa bisinidad it Kalibo International Airport agud nga maghimo it route security kon may mga VIPs nga maga-abot kaeakip man ro maga-abot nga VIPs halin sa Iloilo City ag Caticlan.
Samtang, makit-an man ro presensya it pila ka mga law enforcement agency sa sueod ag guwa it festival zone pamaagi sa mga pagahimuon nga mobile patrol ag foot patrol.
