Mas hugut nga seguridad ro ginapatuman makaron sa Batasan Pambansa sa Quezon City matapos ipaidaeom sa total lockdown ro kamara epektibo kahapon it alas-12:00 it udtro adlaw bilang pagpahaum sa kauna-unahang State of the Nation Address ukon SONA ni Pangueong Ferdinand “Bongbong” Marcos Jr. sa Lunes, Hulyo 25,2022.
Temprano pa eamang hay masako eon ro tanan sa pagpang-limpyo, pag-ayos it Plenary hall, mga opisina it mamalidha, pag install it mga equipments ag maabo nga iba pa.
Makit-an man sa area ro presensiya it mga miyembro it Presidential Security Group (PSG) sa sueod ag guwa it Batasan Pambansa Complex.
Nagalibot eon man ro mga K-9 dogs it PSG kadungan it pagpatigayun it inspection.
Umpisa kahapon hasta sa dominggo hay owa anay it makasueod sa House of Representatives mag-euwas sa mga ginakabig nga “essentials”.
Una eon nga ginpahayag ni House Secretary General Mark Llandro Mendoza nga kapin sa 1,360 ro gin-imbitahang mga guest kung siin kaibahan eon kara ro mga dating presidente, bise presidente ag ro mga miyembro it Dimplomatic corps.
