KALIBO, Aklan–Naghugut eon it seguridad sa isla it Boracay para sa nakataeanang pag-umpisa it 3rd Association of Southeast Asian Nations ukon ASEAN Digital Ministers Meeting.
Suno kay P/Capt. Aubrey Ayon, tagapaghambae it Aklan Police Provincial Office (APPO) nga padayun ro andang pakikipagpueong sa mga natungdan nga ahensiya it gobyerno agud nga mabantayan ro mga posibleng lugar nga paga-agihan it delegasyon.
Owa pa sigon nakatau kanda ro host agency nga deparment of information and communications technology ukon DICT it ensaktong numero it magatambong nga foreign ag local delegates kamana man it venue nga pagahiwatan it event.
Gina-istoryahan eon makaron it malay municipal police station sa pagpanguna it andang hepe nga si P/Lt. Col. Don Dicksie de Dios ro numero it mga iga-augment nga pulis ag soldado nga igapakalhit sa nagkaeain-eain nga parte it isla para sa ASEAN meeting nga maga-umpisa sa pebrero 6 hasta 10 it makaron nga dag-on.
Nakataeana man sigon nga iga-activate ro multi-agency coordinating center para ma-monitor it mayad ro kaeowasan ag seguridad it mga delegado.
Nasayuran nga ro komperensiya hay pagatambunagn it Information and Communications Technology Ministers and Government leaders it mga ASEAN member states nga nagatuyo nga makahimo it mas mabaskog nga collaboration para sa mas mayad ag mas sustainable nga digital future.
Raya hay may tema makaron nga “Synergy Towards a Sustainable Digital Future.”
