KALIBO, AKLAN — kapin pang ginhugtan ro seguridad sa isla it Boracay makarong Valentine’s Day bangud kadungan kara ro mga aktibidad it Association of Southeast Asian Nations (ASEAN) ag pagdungka it sangka international cruise line.
Suno kay SPO1 Nida Gregas, tagapaghambae it Aklan Police Provincial Office (APPO), mag-eowas sa mga delegado it ASEAN meetings hay bumuhos man sa isla makarong adlaw ro masobra sa 2,000 cruise passengers ag kapin sa 1,000 crew it MS Celebrity Constellation.
Ro Boracay hay kaeakip sa Asian Tour it nasambitang cruise ship nga naghalin sa Singapore ag magaderetso sa Malaysia.
Haeos 3,000 security personnel ro nakaeapta sa isla partikyular sa jetty port, billeting areas ag mga karsada.
Ginpahayag pa ni Gregas nga ko Enero pa nagpadaea it dugang nga pulis agud masigurado ro seguridad.
Presenteng ginapatigayon makaron sa Boracay ro pueong it ASEAN Intergovernmental Commission on Human Rights nga nag-umpisa ko Pebrero 13 nga magatapos hin-aga samtang ro retreat it ASEAN Ministerial Meeting hay maga-umpisa sa Pebrero 19 hasta it 21.
