KALIBO, Aklan — Hugot gihapon ro ginapatuman nga seguridad sa pagsueod it mga tawo sa isla it Boracay sa pangaywang adlaw it dry run bilang pagpahaom sa uman nga pagbukas kara sa mga turista sa Oktubre 26.
Kahapon hay ginpangunahan ni P/CSupt. John Bulalacao, regional director it Police Regional Office (PRO)-6 ro pagbantay sa “salubungan” it mga Boracaynons ag Aklanons agud masiguro ro kaeowasan ag seguridad it mga bisita ag komunidad sa isla.
Eauman sigon nga mas kapin pang pagahugtan ro pagbantay sa soft opening kara sa masunod nga dominggo.
Sa makaron ro mga nagasueod nga tawo hay kinahang-eang magpakita it ID ukon anumang pagkakilan-ean agud masayuran it mga opisyal nga nagabantay sa Caticlan jetty port kon sanda hay residente, empleyado, turista ukon negosyante.
Nasayuran nga ro ginbilog nga Metro Boracay Police Task Force nga ginpangunahan ni P/SSupt. Jesus Cambay, deputy regional director for operations it PRO-6 ro nakabantay sa seguridad it inner ag outer border control it isla ag sa kaeapit pang mga isla kontra sa mga may balak nga isabotahe ro Boracay reopening.
