Kalibo Aklan ——–Agud nga mas pang mapabaskog ro police visibility sa Boracay, nagtukod ro Police Regional Office (PRO-6) it Boracay Operation Command Center ag nagbutang it 25 nga security cameras sa nagkaeain-eain nga lugar sa Isla.
Suno kay Brigadier General Rene Pamuspusan, Regional Director it PRO-6, antes nga ginbuksan ro Isla sa mga lokal nga turista halin sa Western Visayas ko Hunyo 16 hay ginpaidaeum sa serye it mga training ro mga tawuhan it Malay Police Station para sa hugut nga pagpatuman it mga health protocols.
May mga limitasyon sigon sa pagpaligos sa baybay agud nga masiguro nga makasunod sa physical distancing.
Kinahangean nga magpaligos eamang sa mga gintaeana nga swimming area ag dapat anay nga magpa-rehistro agud nga mabantayan ro numero it mga pwedeng magpaligos ukon mag-eangoy it dueuengan .
Bawae man ro mga domestic tourists nga 21 anyos panaba ag 59 anyos pataas nga ginakabig nga pinaka-vulnerable sa coronavirus disease (COVID-19).
Ro tanan nga mga turistang nagasueod sa Isla hay obligadong mag-fill-up it health declaration card para sa madasig nga contact tracing.
Naka-alerto eon man ro pwersa it kapulisan para sa selebrasyon it kapiyestahan ni San Juan de Bautista.
