KALIBO, Aklan—Gindeklara it Land Transportation Franchising and Regulatory Board (LTFRB)-6 nga mga kolorum ro mga traditional jeepney it syudad it Iloilo ag Bacolod bangud sa uwa raya naka-consolidate sa nagtapos nga December 31 deadline it PUV Modernization program.
Suno kay Bacolod Manibela President Rody Agsam Catedral, naging mabahoe nga problema sa mga traditional jeepney sa syudad it Bacolod bangud nga 1,700 ro gindeklara it LTFRB-6 nga kolorum.
Nasayuran nga nakabaehag sa Memorandum circular 2023-052 nga ro tanan nga uwa nakaabot sa 60% nga consolidated nga lugar ukon ruta ag uwa man it Local Public Transport Route Plan (LPTRP) hay qualified sa extension it hasta Enero 31.
Apang nagapati sigon ro LTRFB-6 nga bukon sanda it qualified sa nasambit nga memorandum bangud nga may LPTRP ro syudad it Bacolod ag Iloilo nga eain sa pahayag it grupong PISTON ag MANIBELA.
Sa makaron, gina-challenge man ni Catedral ro taeatapan it LTFRB ag LTO nga dakpon ro tanan nga kolorum ag ipatuman ro layi.
