KALIBO, Aklan — Gin-aresto ro sangka security guard matapos nga aksidenteng hapaeupok ro anang service firearms samtang nga naka-duty maeapit sa Kalibo International Airport bandang alas-10:00 kabi-I sa Brgy. Nalook, Kalibo.
Nakilaea ro suspek nga si Garry Inventado, 47, residente it Abierra St. Brgy. Andagao, Kalibo nga naka-assign sa Southwest Travel and Tours.
Base sa imbestigasyon it pulisya, nakita it van driver nga si Obet Ibo ro sekyu nga nagbo-oe it anang baril ag ginpa-eupok.
Makataliwan ro pilang minuto, uman nga nagpaeupok ro suspek nga nagtuga it kakoeba sa mga tawo sa lugar.
Depensa ni Inventado nga accidental firing ro natabu bangud nga palyado ro baril.
Natukiban pa nga expired eon ro lisensiya it baril.
Ro sekyu hay gin-aresto it mga rumespondeng tawuhan it Aviation Police.
Magapangatubang sa nagakaigo nga kaso ro suspek nga makaron hay kulong sa lock-up cell it Kalibo Police Station.
