KALIBO, Aklan — Matapos nga mabitin sa pag-videoke, sangka pasaway nga security guard ro gin-aresto it mga tawuhan it Malay Municipal Police Station kat pilang beses nga nagpina-eupok it baril sa guwa it andang boarding house bandang alas-10:30, Huwebes it gabi-i sa Sitio Logutan, Brgy. Manocmanoc, Boracay.
Nakilaea ro suspek nga si Marvin Esteves, 32, residente it Angas, Batan, apang temporaryong naga-istar sa nasambit nga lugar.
Base sa report, naakig sigon ro sekyu kat ginsaway it landlord nga si Arnoldo Arizala nga punduhon eon ro andang pag-videoke bangud nga nagatuga eon raya it disturbo sa mga kaeapitbaeay.
Naakig sigon ro suspek ag ginpaeupok it pilang beses ro anang baril.
Sa pag-responde it kapulisan, insigidang gin-disarmahan si Esteves it anang .38 revolver nga may ap-at nga bala.
Imaw hay nagapangatubang sa kasong pag-eabag sa Republic Act 10591 ukon Comprehensive Law on Firearms and Ammunition.
