KALIBO, Aklan—Naging matawhay ro kabilugan nga selebrasyon it kapiestahan ni Sr. Sto. Niño de Kalibo makaron nga dag-on sa pihak it nagapadayun nga paeag it COVID-19 pandemic.
Base sa pagtan-aw it Municipal Disaster Risk Reduction and Management Office (MDRRMO)-Kalibo naging disiplinado man ro mga tawo eabi eon ro mga nagtambong sa ginpatigayun nga Pilgrims Mass it St. John the Baptist Cathedral ko Dominggo.
Ginpahayag ni MDRRMO-Kalibo Head Terence Toriano, nakita nanda ro strikto nga pagpatuman it minimum health protocols it mga katapo it kapulisan ag iba pang law enforcement agency sa selebrasyon it Ati-atihan festival.
Sa pihak kara, owa man ginpamalibaran ni Toriano nga may pila gihapon nga mga pasaway eabi eon sa mga kabarangayan bangud kaeabanan sa mga raya hay owa it suksok nga face mask ag nakalipatan eon ro pagdistansya sa kada isaea sa tunga it pagkinasadya.
Matueopangdan nga raya eon ro ikaywang dag-ong nga ginselebrar ro Ati-atihan festival nga may pandemya.
Kung siin kaeabanan sa mga aktibidad hay virtual.
Apang, owa man napunggan ro pagdagsa it ginatos nga mga deboto sa ginpatigayun nga caravan ag grand procession ko adlaw it Dominggo.
