KALIBO, Aklan—Kabilugan nga naging matawhay ro selebrasyon it kaugalingon nga bersyon it Ati-atihan Festival sa banwa it Altavas ag Ibajay.
Suno kay PSSgt. Jane Vega, tagapaghambae it Aklan Police Provincial Office (APPO) nga nakalista sanda it zero major incident sa kabilugan it selebrasyon it daywang ka mga banwa.
Nasayuran nga nagpadaea it kapin sa 200 ka mga augment nga PNP personnel ro APPO sa banwa it Ibajay mag-euwas pa sa mga katapo it MDRRMO, reservist, Philippine Army ag iba pang volunteer groups.
Ginpabugae man kara nga naging epektibo ag madinaeag-on ro andang ginplastar nga security plan makaron nga dag-on.
Samtang, nakatutok man makaron ro APPO sa pagpahaum para sa pagahiwaton nga ASEAN meeting sa isla it Boracay.
Eauman sigon ro hugut nga pagbantay ag pagtao it seguridad it mga kapulisan para masiguro ro kaeuwasan it mga pumueoyo ag delegado.
