KALIBO, Aklan—Ginlimitahan it lokal nga gobyerno it Makato ro selebrasyon it andang kaugalingon nga bersyon it Ati-atihan Festival sa andang mga kasimanwa.
Raya hay matapos nga magpagguwa it Executive Order si Mayor Atty. Abencio Torres kung siin nakabehag ro pagbawae sa pagsueod it mga bukon it taga-Makato sa sueod it daywang adlaw nga selebrasyon umpisa Enero 14 hasta 15.
Suno kay Police Lieutenant Merriefin Carisosa, hepe it Makato Municipal Police Station, nagplastar sanda it ap-at ka mga border control point partikular eon sa Brgy. Dumga ag Tugas diversion road kamana man sa Brgy. Poblacion ag Cayangwan kaibahan ro iba pa nandang force multiplier.
Mag-eowas kara, hugut man nga ginapatuman ro “no vaccine, no entry policy” para masiguro ro kaeuwasan it mga deboto.
Dugang pa ni Lieutenant Carisosa nga ginaeauman eon nanda ro pagdagsa it maabu nga tawo rason nga kinahang-ean ro striktong pagpatuman it minimum public health protocols.
Kaeabanan sigon sa mga aktibidad hay ginprepara it simbahan samtang ro daywang contest nga ginpatigayun it lokal nga gobyerno hay para eamang sa mga bakunado.
Angot kara, owa sigon sanda it nailista nga anumang insidente nga may kahilabtanan sa selebrasyon it Ati-atihan Festival.
