Matapos nga owa it moon sighting, igaselebrar it Muslim community sa andang nagkaeain-eain nga mosque sa probinsiya it Aklan ro “Eid al-Fitr” hin-aga nga adlaw it Sabado, Marso 21.
Raya ro ginkumpirma ni Abdul Karim, member coordinator it Muslim community sa banwa it Kalibo.
Suno kana nga ro “Eid al-Fitr” hay ro andang magarbong selebrasyon sa pagmarka sa pagtapos it andang sang buean nga fasting sa Ramadan nga naga-umpisa sa pagtunod it adlaw hasta sa pagbut-eak it adlaw.
Ro Eid suno kana hay tiempo man it andang pagpatawad, kalinong, pagpasaeamat, ag pagpadayun it disiplinang nakasanayan ko tiempo it Ramadan kun sa siin maabu ro ginabawae.
Dikara man ginapatigayon ro paghinoesoe sa mga saea nga nahimo, pagbulig sa isigkatawo ag uman nga pagkonekta sa andang mga igbata.
Ginaselebrar sigon ro adlaw it Eid al-Fitr ukon “the Feast of Breaking the Fast” sa unang adlaw it Shawwal, ro ika-10 nga buean sa Islamic lunar calendar.
Kaeabanan raya nga gina-umpisahan antes magbut-eak ro adlaw kun sa siin temprano sanda nga nagabugtaw agud nga magpangadi it andang morning prayer bago ro mga pagpahaum sa selebrasyon.
Ginasundan raya it ceremonial cleansing it eawas.
Naga-ilis man sanda it malimpyo ag bag-ong eambong.
Nauna eon nga gin-anunsyo it Malacañang ko Marso 12, nga regular holiday ro Marso 20 bilang komemorasyon sa Eid al-Fitr makaron nga 2026, apang bangud sa owa nagpakita ro buean hay igapatigayon raya hin-aga nga adlaw it sabado.
