KALIBO, Aklan—Bangud sa ginapangatubang nga covid 19 pandemic, naging simple ro selebrasyon it Eid’L Fitr ukon pagtapos it Ramadan it mga Muslim.
Ginpaathag ni Kelvica Arindig ukon Sitti Raqma Arindig nga ro Eid’L Fitr hay ro pagtapos it sagrado nga buean it pagpangamuyo ag pag-ayuno sa Ramadan.
Nasayuran nga ro selebrasyomn hay national holiday sa Pilipinas, nga ginatawag man nga “Pagtapos it Ramadan,” ag “Pagkatapos it Pag-ayuno” ukon fasting sa idaeum it Republic Act 9177.
Suno kana nga gin umpisahan ni Propeta Muhammad ro Eid’L Fitr nga selebrasyon ag pagpasaeamat kay Allah.
Raya hay tatlong adlaw nga kapistahan nga senyales it unang adlaw it buean it Shawwal, nga kasunod it Ramadan sa kalendaryong Islam.
Nagatambong ro mga Muslim sa pagtililipon agud nga magpangamuyo, nagapamati sa sermon ag nagatau it zakat al-fitr ukon bulig sa mga pigado.
Ro mga mayad nga binuhatan sigon ag pagbulig sa isigkatawo nga nagakalisod hay kaibahan sa mga mayad nga ginaturo sa Islam.
Ginapatigayon sigon nanda ro ritwal nga paghugas ag pagsuksok it bag-ong eambong antes nga magtambong sa pagtililipon sa mga mosque.
Samtang, gindugang pa kara nga sa andang selebrasyon hay hugut nga ginpatuman ro physical distancing sa pagtambong sa andang mga aktibidad bangud sa padayun nga paeag it deadly virus.
