KALIBO, Aklan–Makabig nga espesyal ro selebrasyon it Mother’s Day sa nasyon it Tonga.
Raya hay bangud nga ginataw-an it mabahoe nga importansya it mga Tongan ro andang mga ina sa rayang adlaw.
Suno kay Bombo International Correspondent Merylen ag Diony Tandug nga nagapahaum it maabu nga pagkaon ro magpamilya para iselebrar ro adlaw it mga ina.
Kaeabanan sigon sa mga Tongan hay owa nagakinahang-ean it anumang regalo kundi gusto eamang nanda nga makaibahan ro andang mga unga ag apo.
Sa raya sigon nga espesyal nga adlaw, ginabalikan it mga ina kung paano nanda gin-giyahan ro andang mga unga.
Suno sa mag-asawang Merylen ag Diony, ro ina hay ro pundasyon ag pinaka-espesyal nga parte it sangka pamilya.
Ro pamilya sigon ro unang eskwelahan it mga unga kung siin ro mga ina ro nagaserbing manugturo.
Ro buean it Mayo sa Tonga hay nagatao it mabahoe nga haega sa importansya it pamilya.
Samtang, nagapati man ro mag-asawa nga dapat masayuran it parehong ginikanan ag unga ro andang responsibilidad ag obligasyon para mapabilin ro manami nga pagsinaeayo sa sueod it panimaeay.
