KALIBO, Aklan—Uman nga gin-istoryahan sa plenaryo it Sangguninang Bayan sa banwa it Kalibo ro nagahilapit sa selebrasyon it Kalibo Santo Ninio Ati-atihan Festival 2020.
Suno kay Sangguniang Bayan Member Augusto Tolentino nga nakaplastar eun ro plano it simbahan angot sa pagahiwaton nga selebrasyon.
Pamaagi sa presensiya ni Fr. Tudd Belandres it Saint Jhon The Baptist Cathedral Chruch hay naipaabot sa plenaryo ro matabong pagbag-o sa mga aktibidad.
Suno sa gin-istoryahan, magapdayun ro pagselebrar it Ati-atihan apang maduea eun ibang nakasanayan it mga deboto kapareho it pagpahilot ag pagsadsad sa kalye ukon street dancing.
Owa man it kanselasyon sa misa.
Raya hay bangud ginpasiguro it simbahan nga hugot karang igapatuman ro mga health protocol agud malikawan ro pagkalhit pa it makamaeatay nga sakit nga coronavirus disease ukon covid-19.
Samtang ro procession hay pilang ka indibidwal eamang ro pagapasugtan nga makapartisipar.
Ro mga deboto hay gina-engganyo eun lang nga maghueat ag magpamantaw sa binit it karsada ukon sa guwa it andang panimaeay.
