KALIBO, Aklan — Nag-umpisa eon ro pagselebrar it “Yawa-Yawa” festival sa pilang barangay sa banwa it Ibajay makaron nga Disyembre 28, 2024.
Suno kay SK Chairman John Aris Suñer it Brgy. Maloco Ibajay, gintinguha gid nanda nga maboe-an it permit sa munisipyo ro andang dag-unang selebrasyon nga ginpasugtan man it mga natungdan ag ginsiguro nanda ro kaeuwasan it mga nag-ieintra sa pamaagi it pagpa-register kanda ag pagtao it mga control number para ma monitor ro mga pamatan-on nga nag partisipar.
Ro nasambit nga selebrasyon hay pagdumdom sigon sa istorya sa bibliya kun sa siin gin-sugo ni Haring Herodes nga pamatyon ro tanan nga mga inunga sa Bethlehem bangud gina usoy nanda si Jesus.
Nagumpisa raya mismo sa Brgy. Maloco Ibajay ag gin-adapt man it ibang barangay.
Ro mga naga partisipar hay mga eaeaki nga pamatan-on nga nagasuksok it maskara nga ubra halin sa “gunot, may madamoe nga kilay, may sungay, ag sanggot ukon karit nga pangpahadlok sa mga inunga.
Samtang, ro nasambit nga selebrasyon hay gin kilaea it munisipyo it Ibajay bilang Intangible Cultural Heritage nga ginapahisyod sa tanan it Ibajay Culture and Arts Council.
