KALIBO, Aklan—Mag-eowas sa tradisyunal nga selebrasyon sa Bethlehem, ginakabig nga “capital of Christmas” hay ginpakamayad it kaabuan nga pamilya sa Jerusalem sa Israel nga ikansela man ro andang selebrasyon agud nga maki-ugyon sa nagapadayun nga giyera sa Gaza ag kinagamo sa West Bank nga nagtuga it grabeng kasamaran sa mga komunidad sa Palestine.
Raya ro ginpahayag ni Bombo International Correspondent Melly Jean Novilla it Tel Aviv, Israel.
Suno kana nga ginpakamayad it mga pumueuyu idtu nga indi anay magpatigayon it Christmas celebrations sa mga pampublikong lugar bilang pakikipag-unong sa mga taga-Gaza nga naigpit sa giyera it Hamas ag Israel.
Kaabuan sigon sa mga panimaeay idtu hay owa nagbutang it mga Christmas lights, owa it mga parada, ag owa man nagtukod it higante nga Christmas tree sa mga nagapangunang lugar nga dati hay ginadayo it mga pumueuyu ag mga turista.
Dugang pa nga owa man masyadong naga-warang ro mga tawo para sa andang seguridad bangud sa pagkabaeaka nga matamaan it mga ginapaeupad nga missile it magtimbang nga parte.
Mas ginpakamayad sigon nanda nga it i-selebrar it simpli ro pagkatawo ni Hesus sa espiritwal nga pamaagi kapareho it pagpangamuyo ag misa kamana man ro saeo-saeo it pamilya sa sueod it baeay.