KALIBO, Aklan—Mabahoe ro pagbag-o it selebrasyon it paskwa makaron nga dag-on para sa mga taga Los Angeles, California bangud sa ginpatuman nga stay-at-home restrictions.
Suno kay Bombo International Correspondent Ira Pedrosa it Los Angeles, California nga minilyon nga mga residente it nasambit nga estado ro nagpabilin sa andang panimaeay kasunod it ginpatuman nga maeapnagon nga shutdown it andang gobernador bangud sa paeag gihapon it COVID-19 pandemic.
Raya hay bangud sa padayun nga pagtaas it kaso it covid-19 infections ag mga na-ospital tuga it nasambit nga makamaeatay nga virus.
Suno kay Pedrosa ro shutdown nga nag-umpisa ko domingo hay posibleng magabuhay it kapin sa tatlong domingo ukon hasta sa Enero 4.
Apang pila sigon sa mga pumueuyu hay owa nagpati sa nasambit nga mandu ag nagpatigayon gihapon it “get together” kaibahan ro andang mga pamilya.
Ginpahayag nga ro nasambit nga mandu hay nagtuga it pagkadismaya bukon eamang sa mga pumueuyu kundi pati man sa mga negosyante nga ginaeauman nga makabawi eon kunta sa pagbuhos it mga Christmas shoppers.
Gindugang pa kara nga masyadong bagsak makaron ro negosyo idtu bangud sa epekto it ginpatuman nga restrictions tuga it covid 19.
