KALIBO, Aklan–Masadya ro selebrasyon it Paskwa sa nasyon it Bolivia.
Raya hay bangud 77 porsyento it mga pumueoyo idtu hay Katoliko.
Suno kay Bombo International Correspondent Mercedita Joven Montilla it Santa Cruz, Bolivia nga naga-umpisa sa pagbutang it dekorasyon ro mga pumueoyo pag-abot it Disyembre 20.
Kaeabanan sigon sa mga mall ag panimaeay hay nagapatindog it Christmas tree nga napalibutan it nagkaeain-eain nga dekorasyon ag paiwag.
Samtang, pag-abot it noche buena masako man sa pagprepara it pagkaon ro mga tawo kung siin sambilog sa andang espesyal nga ginahanda hay ro lechon baboy, patatas nga gina-eaha sa oven ag einaga nga mais.
Mahilig man sigon sanda sa mga sweets ag pag-abot it Disyembre 25 nagabaeayluhan sanda it regalo.
Apang, ro selebrasyon it Paskwa sa Bolivia hay limitado eamang sa magpamilya ag owa nauso idtu ro mabahoe nga pagtililipon.
