Ginpahayag it nagabalik nga Senador nga si Francis ”Chiz” Escudero nga ro anang 20 priority legislation sa idaeom it 19th Congress hay ginakaeakipan it proposisyong amyendahan ro 31-anyos nga Republic Act (RA) No. 7160, ukon ro Local Government Code of 1991, sa katuyuang pabaskugon ro awtonomiya it mga local government units (LGUs) pamaagi sa mas rationalized system it decentralization.
Para suportahan ro awtonomiya it mga LGU, nagdihon si Escudero it magkaiba nga proposisyong laye nga tuyo nga pagbawaean ro ano man nga klase it pag-intra it gobyerno national sa paggamit it national tax allotment—nga dating ginatawag nga Internal Revenue Allotment (IRA)—ag iba pang locally generated revenues.
Suno pa sa beteranong senador nga ro pagdihon nana it kambal nga mga proposisyong laye hay kaparte it anang promisa sa kampanya nga maging boses it mga LGU sa Senado pamaagi sa pagsikyar nga ro mga LGU hay minatuod nga nakaka-angkon it otoridad ag nagasarili bilang mandato sa 1987 Constitution at RA 7160.
Kaibahan sa mga pag-amyenda sa Local Government Code nga ginsuhesiyon ni Escudero hay ro epektibo nga alokasyon sa nagakaeain-eain nga local government units (LGUs) it andang kada obligasyon, responsibilidad, ag resources nga independyente sa ano man nga pagstrikto maghalin sa national agency.
