Owa nakapagsumite it anang kontra-salaysay si Senador Robinhood ‘Robin’ Padilla sa ginpatigayon nga ‘preliminary investigation’ sa reklamong anang ginapangatubang sa Department of Justice.
Suno kay Atty. Jimmy Bondoc, abogado it respondent, may kueang pa sigon sa reklamo rason nga owa anay nagsumite it ‘counter-affidavit’ ro senador.
Sa proseso pa sigon sanda it pagpangayo it kopya it reklamong ginpasaka it Philippine National Police-Criminal Investigation and Detection Group kontra kay Sen. Padilla.
Raya hay matapos nga nataeupangdan it prosekusyon nga kueang pa ro mga dokumento it ahensiya sa reklamong ginpasaka rason nga gintaw-an it kahigayunan para maisumite ro kinahangeanon nga dokumento.
Madumduman nga ginpasakaan imaw it kaso it PNP-CIDG it reklamong ‘obstruction of justice’.
May kaangtanan raya sa gina alegar nga pagbulig kay Senador Robin Padilla nga makatakas ukon makaguwa it pasilidad it Senado kat nagguwa ro ‘arrest warrant’ halin sa International Criminal Court.
Sa pihak kara, sa ginpatigayon nga preliminary investigation kahapon, personal nga nag-atubang ag nagtambong ro respondent nga si Senador Padilla.
Matapos ro preliminary investigation, sa pagguwa ni Sen. Padilla it Department of Justice, ginsug-aeaw imaw ni Senador Bong Go.
Suno kay Go, nag-agto imaw agud nga ipakita ro suporta sa anang amigo nga si Sen. Padilla.
Gintaeana ro masunod nga preliminary investigation sa Oktubre 9 samtang ro pagsumite it ‘kontra-salaysay’ hay sa Nobyembre 12.
