Ginpasiguro ni Senate Secretary Renato Bantug Jr., ro kahauman sa seguridad it Senado engkaso nga maisipan ni Vice President Sara Duterte nga mag-atubang sa anang impeachment trial.
Nasayuran nga ko udtro adlaw it Martes hay gulpi eon lang nga nag-abot sa Senado si VP Sara para makipagpueong sa anang defense team apang owa man raya nag-atubang sa anang pagbista.
Ginpahayag ni Bantug nga kaibahan sa naistoryahan sa coordination meeting ro security arrangement engkaso nga maga-agto ro bise presidente sa anuman nga adlaw it anang pagbista ukon sa pagtambong it anang Chief of Staff nga si Atty. Zuleika Lopez.
Suno kay Bantug, pirme man nga haum ro andang protocol office para makatau it bastante nga assistance anumang oras nga ma-notify sanda sa pag-abot ni VP Sara.
Sa makaron sigon hay owa pa it abiso kun magatambong ro bise presidente sa impeachment trial sa Martes kun sa siin ginapa-atubang it prosekusyon ro anang Chief of Staff nga si Lopez.
Dugang pa ni Bantug, owa naistoryahan sa andang pueong ro angot sa impeachment trial.
