KALIBO, Aklan — Ginkumpirma ni Social Welfare Officer Jessica Candolita it Malay Municipal Social Welfare Development Office (MSWDO) nga nagta-o it financial assistance si Senator Christopher Lawrence “Bong” Go sa anang pagbisita kaibahan ro actor nga si Robin Padilla sa mga biktima it sunog nga nag-eontad ko Oktobre 23 sa Sitio Ambolong Brgy. Manocmanoc sa isla it Boracay.
Suno kana, P2,000 pesos nga cash, groceries ag gamit sa mga onga ro ginpana-o it senador sa 553 ka pamilya nga biktima it mabahoe nga sunog.
Mag-eowas kara, nagta-o man it ayuda ro Department of Social Welfare and Development (DSWD) region VI nga ginakaeakipan it P5,000 nga cash sa kada pamilya.
Sa makaron suno kana hay uwa pa nakadesisyon ro lokal nga gobyerno kon pila ro ayuda nga igata-o sa mga raya bangud nga sigidas pa ro pag-aeabutan it mga bulig.
Madumduman nga kapin sa 200 ka mga istraktura nga ginakaeakipan it mga panimaeay ag boarding houses nga human sa light materials ro gin-eamon it kaeayo sa haeos tatlong oras nga sunog nga may ginatantiya nga danyos nga masobra sa P20 milyon.
