Ginhinyo ni Senador Erwin Tulfo sa mga kaibahan nga senador nga insigida nga ipasa ro Senate Bill 1625 ukon ro West Philippine Sea (WPS) Education Act.
Kasunod raya sa komento it senador nga maabu sa gihapon it mga Pilipino ro kueang sa nagakaigo nga kasayuran angot sa West Philippine Sea ag iba pa nga teritoryo it nasyon.
Bangud kara, nagpanawagan si Senador Erwin sa Senado nga maghimo it aksyon ag magpatigayon it hearing sa nasambit nga isyu sa mas madali nga tiempo.
Importante suno kana nga masiguro nga may bastante ag tama nga impormasyon ro mga Pilipino sa sitwasyon it West Philippine Sea.
Ro hagna hay magahimo it pagtuon sa teritoryo it kadagatan it Pilipinas, eakip ro mga kamatuoran nga ginakilaea it internasyonal, mga desisyon it Korte Suprema, ag mga kapareho nga mga laye angot sa WPS, nga kabaparte it kurikulum sa nagapanguna ag mas mataas nga edukasyon.
Nagapati si Tulfo nga masarangan nga ipakigsukoe ro mga kinamatarong kon nasayuran ro angot sa gina-agawan nga teritoryo.
Nagapaandam man imaw nga kon indi raya paghimuon, panigurado nga mangin target it disinformation ag propaganda nga posibleng makaapekto sa isip it masunod nga henerasyon.
