Hugut nga ginpamalibaran ni Senator Imee Marcos nga imaw ro nagpasimuno sa hana nga kudeta sa liderato ni Senate President Tito Sotto III.
Ginpahayag it senadora nga bukon it imaw ro nagkumpas sa plano nga baeasahan sa senado ag makapamatuod kara ro bilog nga minorya.
Suno pa kana nga ulihi eon imaw nakasayod ag nagsunod sa nasambit nga tikang it minorya nga iduso ro pagbaylo it liderato.
Ginrason ni senador Marcos nga ro pagtuhaw it impormasyon angot sa pagbaylo it Senate President sa sueod it Senado hay ginkakibot it mga senador ag nagdisturbo sa andang institusyon bangud sa mga kaso ag kontrobersiya nga bukon man dapat ro mga senador ro magapanabat.
Ginpunto it senadora nga bukon it “big deal” kana ro mga diskurso ag owa pagka-ilintindihan kon una sa tamang rason butang nga eubus ro anang pagpasaeamat kay Sotto kat ginpabilin imaw nga Chairman it Committee on Foreign Relations maskin nga owa imaw nakaibahan sa mayorya.
Madumduman nga nauna eon nga ginpahayag ni Sotto nga sambilog sa mga nag-trigger it coup d’etat attempt kontra kana ro pagbo-oe kay Sen. Marcos bilang Chairman it Senate Committee on Foreign Relations.
