Hugut nga ginkondina it mga mamamahayag nga naga-cover sa Senado ro pahayag ni Sen. Rodante Marcoleta nga maabu nga katapo it mainstream media ro “bayaran”.
Sa sangka opisyal nga pahayag, ginpaabot it senate press nga iresponsable ag owa it bastante nga basehan nga akusasyon it senador nga ginhimo sa hearing it Senate Blue Ribbon Committee, adlaw it Huwebes, Hunyo 4, 2026.
Suno sa grupo, bukon it makatarunganon ro nasambit nga pahayag sa mga mamamahayag nga padayun nga nagatuman it andang obligasyon sa paghatud it tama ag nagakaigo nga impormasyon sa publiko.
Gintaw-an man it atensyon it senate press nga importante ro papel it media sa sangka demokratiko nga nasyon bangud nga raya ro naga-analisar it mga isyu, naga-verify it impormasyon, ag nagapasabat sa mga una sa poder.
Suno sa media it senado, dapat maghaeong ro mga opisyal it gobyerno sa andang mga pahayag, eabi eon sa tiempo nga nagaeapta ro saea nga impormasyon ag naga-eontad ro gulo sa pulitika.
Gindugang pa it grupo nga kun owa it basehan ro mga alegasyon kontra sa media, mahimo raya nga makaguba it pagsalig it publiko sa lehitimo nga journalism ag makatuga it peligro sa mga journalists.
Ginpanindugan man nanda nga indi dapat mag-intra ro media sa mga inaway sa pulitika bangud ro nagapanguna nga obligasyon kara hay ro pagserbisyo sa publiko ag paghatud it kamatuoran.
Nagapanawagan man ro Senate media kay Marcoleta ag iba pa nga opisyal it gobyerno nga suportahan ro andang mga alegasyon kontra sa mga mamamahayag pinaagi sa ebidensya.
