KALIBO, Aklan—Mabaskog ro pagpati ni Senate Minority Leader Franklin Drilon nga magapadaeagan bilang presidente ag magadihon it anang certificate of candidacy ukon COC si Vice President Leni Robredo antes ro Oktubre 8.
Raya hay matapos nga owa naging madinaeag-on ro andang pakikipag-istorya kanday senador Panfilo Lacson ag senador Tito Sotto nga nauna eon nga nagdeklara nga magapa-ilihir bilang presidente ag bise presidente kamana man kay senador Richard Gordon.
Tuyo kunta nanda nga mahugpong ro tanan nga non-Duterte candidates sa maabot nga eleksyon agud nga makaangkon eamang it sambilog nga kandidato.
Gindugang pa ni Drilon, vice chairman it Liberal Party nga nagakinahangean makaron ro nasyon it sangka lider nga may matuod-tuod nga pag-ulikid sa mga pumueuyung pilipinhon partikular nga nagapangatubang ro nasyon sa pandemya.
Sa pihak nga parte, plano eon ni Drilon nga magretiro sa politika sa 2022.
Owa eon man suno kana imaw it plano nga magpadaeagan sa mas mataas nga posisyon.
