KALIBO, Aklan–Ginkilaea ni Aklan Vice Governor Atty. Reynaldo “Boy” Quimpo ro mga naging kontribusyon it waeong Sangguniang Panlalawigan members nga magatapos eon ro termino sa ginpatigayun nga send-off ceremony kahapon, Hunyo 28.
Sa naging mensahe it bise gobernador, ginpasaeamatan kara ro waeong board member sa andang tampad nga pagtao it serbisyo publiko sa sueod it pilang dag-on nga pagpungko sa pwesto.
Ginpahayag pa kara nga kaibahan sanda sa mga naging kadaeag-an ag pasidungog nga nabaton it probinsya.
Partikular sa Seal of Local Good Governance sa sueod it limang magkasunod nga dag-on umpisa 2015 hasta 2019.
Nasayuran nga ap-at halin sa waeong maga-graduate nga SP member ro nakatapos sa andang tatlong termino.
Raya hay ginakaeakipan nanday 2nd District board member Esel Flores, Nelson Sta. Maria, Ramon Gelito ag si board member Soviet Russia Dela Cruz sa 1st district.
Tanan sanda hay nagbaton it plaque of recognition.
Samtang, nagaeaum man si Quimpo nga igapadayun it waeong bag-ong board member ro manami nga naumpisahan nanda sa Provincial Government kadungan it andang pagpungko umpisa Hulyo 1.
