KALIBO, Aklan–Plano makaron it gobyerno probinsyal nga magpatigayun it special session para taw-an it daean ro send-off ceremony it waeong miyembro it Sangguniang Panlalawigan nga magatapos eon ro termino.
Suno kay SP Secretary Merlyn Montaño, nga ginaproponer nanda nga ipatigayun ro send-off ceremony it mga outgoing board member sa Hunyo 28.
Tuyo kara nga mataw-an it bastanteng oras ro mga board member bangud ro kada isaea kanda hay pagataw-an it kahigayunan nga magahayag it andang ulihing mensahe.
Mag-euwas kara, ginaeauman man nga magatao it anang mensahe si Vice Governor Reynaldo Quimpo.
Nasayuran nga ap-at halin sa waeong maga-graduate nga SP member ro nakatapos sa andang tatlong termino.
Raya hay ginakaeakipan nanday 2nd District board member Esel Flores, Nelson Sta. Maria, Ramon Gelito ag si board member Soviet Russia Dela Cruz sa 1st district.
Tanan sigon sanda hay magabaton it plaque of recognition.
Samtang, pagkatapos man it send-off ceremony hay may pagaeauman man nga inaugural session sa unang Lunes it Hulyo para i-welcome ro mga bag-ong magapungko nga board members.
