KALIBO, Aklan– Confined sa intensive care unit it sangka pribadong ospital sa banwa it Kalibo ro sangka 20-anyos nga eaeaki matapos nga mabun-an kahapon bandang alas 3:53 it pang-orason sa sangka bueangan sa may bahin it Brgy. Poblacion sa banwa it Libacao.
Ginkilaea ro biktima kay James Rata ag residente it nasambit nga lugar.
Sandig sa ginpatigayon nga imbestigasyon it Libacao Municipal Police Station nga antes pa man nga daeayon nga mabun-an si Rata it suspek nga sangka senior citizen nga ginkilaea kay Rojel Herbacio ag 60-anyos hay may nauna eon nga alitan ro nag-eontad sa tunga it daywa.
Pilang buean sigon ro nakataliwan kat nauna eon nga nagbaeaywan sa nasambit man nga bueangan ro daywa.
Hasta sa nagpang-abot kahapon ag nakaangkon it mainit nga diskusyunan sa tunga it mga raya ag natigayon nga ginbuno it suspek ro biktima.
Insigida nga nagpaeagyiw ro suspek matapos ro insidente apang gilayon man nga naaresto it katapo it kapulisan sa may bahin it Brgy. Pinonoy, Libacao sa ginpatigayon nga hot pursuit operation.
Angot kara, insigida man nga gindaea sa ospital ro biktima matapos nga makaangkon it daywang ka tama it pagpangbuno sa may dughan ag likod nga porsyon it anang kaeawasan.
Sa makaron, sa paghinakop it Libacao PNP ro suspek ag magapangatubang sa nagakaigong disposisyon.
