KALIBO, Aklan—Nakilaea eon ro senior citizen nga nakit-an nga owa it kabuhi sa binit it baybayon nga sakop it Brgy. Cawayan sa banwa it New Washington.
Suno kay Nicanor Denila Jr., it Municipal Disaster Risk Reduction Management Office ukon MDRRMO New Washington nga ro biktima hay nakilaeang si Vivencio Ismael Ramos, 64 anyos ag residente it nasambit nga lugar.
Pilang mga residente sigon sa lugar ro nagpaabot kanda it impormasyon nga bandang alas-9:50 it gabi-i hay may nakit-an nga eawas it tawo nga naga-eutaw-eutaw sa kilid it baybay nga ko ulihi hay andang ginpabinit bangud nga uwa raya it alintro.
Sa pagresponde it andang mga emergency personnel hay gilayon nga nagpatigayon it Cardiopulmonary resuscitation ukon CPR, kun sa siin uwa eon naga-response ro biktima.
Gindaea nanda raya sa Aklan provincial hospital apang gindeklara nga patay eon it attending physician.
Pagkaeomos ro gintunaan it hinali nga kamatayon it nasambit nga senior citizen.
Bangud kara, uman nga ginapanawagan ni Denila sa mga residente ag beachgoers nga indi magpaligos sa baybay kon naka-inom ukon sa impluwensiya it aeak.
