Sentimiyento it tatlong LGU nga sakop it ginaduso nga WASEZA, importante nga masayuran–Vice Gov. Quimpo

KALIBO, Aklan–Ginkasugtanan it mga miyembro it Sangguniang Panlalawigan nga magtao it ‘reserve action’ kaangot sa gindihon ni Aklan 2^nd District Congressman Teodorico Haresco nga House Bill 7032 ukon West Aklan Special Economic Zone Authority (WASEZA).

Ro nasambit nga hagna hay gindihon ni Congressman Haresco sa House of the Representatives kung siin ginpaidaeom eon sa pagpamati sa Committee level ko mga nagtaliwan nga adlaw.

Suno kay Vice Governor Atty. Reynaldo Quimpo nga owa sanda it ‘prior notice’ angot sa ginaduso nga legislative measures antes raya gindihon sa manabang kapueongan it kongreso.

Apang, gintinguhaan sigon nanda nga makabuoe it kopya para ma-estudyuhan ro kaundan kara.

Nasayuran nga ro House Bill 7032 hay magasakop sa porsyon it tatlong munisipalidad nga ginakaeakipan it Tangalan, Ibajay ag Malay.

Gintaw-an it punto it bise gobernador nga importante ag kinahang-ean nanda nga masayuran ro sentimiyento it mga kabanwahanan nga apektado kara.

Sa makaron hay ginahueat pa nanda ro posisyon it natungdan nga mga lokal nga gobyerno angot sa nasambit nga hagna.