KALIBO, Aklan — Ginpaabot ni Municipal Election Officer Atty. Christian Itulid it Commission on Elections (Comelec-Kalibo) nga ro gintaeana nga September 30 nga deadline sa registration of voters para sa nagahilapit nga 2025 national and local elections hay owa eon it extension.
Kadungan kara, anang gin-engganyo ro iba pang mga botante nga deactivated ro status nga mag-apply eon para sa reactivation.
Umpisa nga ginpatigayon ro voter registration ko nagtaliwan nga Pebrero 12, 2024 hasta Hunyo 30, 2024, naga-abot eon sa 1,823 ro numero it mga botante nga naaprubahan ro andang aplikasyon para sa transfer, new registrants ag correction of entries sa banwa it Kalibo .
Ginaeauman nga magataas pa sigon ro nasambit nga numero hasta sa ulihing pagpatigayon it Election Registration Board (ERB) hearing makaron nga buean it Agosto kun sa siin may naka-pending nga 752 nga aplikante.
Gina-deactivate ro mga botante nga napas-eawan nga makaboto it magkasunod nga eleksyon , naduea ro Filipino citizenship, ag owa it balido nga mga dokumento.
Gindugang pa ni Atty Itulid nga ro mga botante nga may multiple registrations hay ginaduea man sa listahan kamana man ro pangaean it mga botante nga namatay eon.
Sa pihak nga parte, nagpadumdum ro Comelec angot sa nagahilapit nga pagtapos it Register Anywhere Program sa Agosto 30 kun sa siin 100 hasta 150 ro naka-avail kara.
May schedule pa sigon sanda it satellite registration sa City Mall Kalibo sa maabot nga Agosto 22 hasta 24 samtang sa Saint Gabriel College hay sa Agosto 19.
Mag-eowas kara, magapatigayon man it kaparehong aktibidad sa masunod nga buean it Setyembre sa iba pang mga lugar agud nga mas pa nga mapasaka ro numero it mga magapa-rehistro.
