KALIBO, Aklan — Todo eon ro pagpahaom it Boracay inter-agency task force para sa uman nga pagbukas it isla sa mga turista hin-aga, Oktubre 26.
Sa interview it Bombo Radyo, ginpahayag ni Community Environment and Natural Resources Office (CENRO)-Boracay head Atty. Richard Favila nga magiging simple eamang ro seremonya para sa Boracay reopening.
Pila sa mga nakalinyang aktibidadis hay ro unveiling it bag-ong hitsura it Cagban jetty port.
Sa makaron sigon hay masako ro mga trabahador sa pag-ayos ag pagpanami it nasambitang pantalan.
Kadungan sa pagbukas it Cagban jetty port, pagaboe-on eon ro poontoon ukon floating port nga ginbutang sa gintaeanang tatlong boat stations sa front beach.
Makaangkon sigon it seperadong dungkaan ro mga empleyado ag mga turista.
Dugang pa ni Atty. Favila nga may pilang main roads ro pagabuksan ag igapakita ro iba pang dapat bantayan sa “New Boracay”.
Kaparehas it anunsyo ni Pangueong Rodrigo Duterte, inde raya magtambong sa uman nga pagbukas it isla.
Sa makaron hay nagsiaeabutan eon ro ibang mga opisyal it kaparehas ni Environment Secretary Roy Cimatu ag iba pa.
Samtang, uman nga nagpadumdom si Atty. Favila nga sa pagsueod it mga turista sa isla hay dapat nga masiguro it mga raya nga nagpa-book sanda sa mga accredited nga hotels ag resorts agud inde maunsyami ro bakasyon sa Boracay.
