KALIBO, Aklan—Ginaistoryahan eon makaron it Department of Education, Civil Service, ag it ACT ro service credits it mga manugturo kon sa siin owa dapat raya it limitasyon sa 15 diyas kada dag-on.
Suno kay ACT-Partylist Representative France Castro, naga-ubra eon it memo ukon order ro DepEd angot sa ginahinyo it mga manugturo.
Ginklaro man it nasambit nga ahensya ro proportional vacation pay it mga manugturo.
Nasayuran nga nakataeana sanda sa 70 days summer vacation pay ag 14 diyas kon Christmas vacation.
Ginatan-aw sigon it DepEd ro agreement angot sa computation it proportional vacation pay it mga manugturo.
Samtang, naga-eaom man si Castro nga ma-istoryahan ro anda nga proposal angot sa salary increase it mga maestra bangud nga magatapos eon ro Salary Standardization Law V ukon SSL5 sa December 31.
Suno pa kana, kon uwa it laye angot sa salary increase sa 2024, uwa man it pagtaas sa sweldo it mga manugturo kamana man it mga government employees.
Sa makaron, aprubado eon sa third reading ro teaching supplies it mga manugturo.
Magasaka sa P7,500 halin sa P5,000 sa unang dag-on it pagpatuman ag umpisa man sa ikaywang dag-on it implementation hasta sa madason hay magiging P10,00.
Aprubado eon raya sa senado ag ginahueat eon lang ro bicameral committee meeting para makaangkon it consolidation.
Nagaeaom man si Castro nga indi raya pag i-veto it pangueo bangud nga ro mga allowances hay magamit it mga manugturo sa andang mga visual aids, 3-D visuals, ag iba pang supplies nga kinahang-ean nanda.
