KALIBO, Aklan—Nagpatigayon it serye it mga aktibidades kadungan sa selebrasyon it pagdumdum sa pagtukod it probinsiya it Aklan.
Ginpangunahan ni Aklan governor Joen Miraflores ro mga aktibidad sa selebrasyon it 67th anniversary, kun sa siin haeos normal eon ro sitwasyon kasunod it pagpanaeasa it COVID-19 pandemic.
Raya hay gin-umpisahan pinaagi sa sangka misa sa St. John the Baptist Cathedral nga ginsundan it civic military parade nga ginpasakupan it mga empleyado it nagkaeain-eain nga LGUs, Department of Education ag iba pang mga ahensiya it gobyerno.
Nakaangkon it programa sa ABL sports and cultural complex kun sa siin naging dinapit nga bisita si senador Loren Legarda.
Suno sa gobernador nga nalipay imaw bangud nga makataliwan ro tatlong dag-on hay uman nga nakapatigayon it kaparehong aktibidad.
Ro pagpatigayon it Aklan Day kada dag-on hay ginakabig nga special non-working holiday sa Aklan sa idaeum it gahum it Republic Act 1414 nga ginpirmahan ko Abril 25, 1956 ni dating Pangueong Ramon Magsaysay.
Sa pihak nga parte, nagpatigayon man ro provincial government it kauna-unahan nga “Hinuguran It Akeanon” trade fair nga nag umpisa ko Abril 17 hasta 28, 2023 sa Trade Hall it Provincial Capitol Grounds.
Ginapakita sa “Hinuguran” trade fair ro nagkaeain-eain nga cultural events nga nagatau it importansiya sa kamayad ag abilidad it mga Aklanon kapareho it Aklan Piña and Fiber Festival, Talibong Festival, ag Ati-Atihan Festival.
Ro nasambit nga trade fair hay sambilog sa mga highlights it selebrasyon nga magapakita sa hinaboe nga mga tela ag mga kagamitan nga himo sa piña ag iba pang indigenous fibers, fashion accessories, mga regalo, furnishings, decorative crafts, food products ag maabu nga iba pa.
Samtang, kaibahan pa sa pilang public activities hay ro pagkilaea sa 2023 Most Outstanding Aklanons.
