KALIBO, Aklan — Nagpaandam ro theft and robbery section it Kalibo Police Station angot sa eapnaag nga paeanakawan makaron sa banwa it Kalibo nga kaeabanan sigon nga ginabiktima hay ro mga panimaeay nga owa it tawo, kun sa siin, ginapuntirya it mga menor de edad nga takawon ro kwarta ag cellphone.
Ginpahayag it sambilog sa mga biktima, sa prente mismo it andang baeay sa Roxas Avenue Kalibo nagsaka ro mga inunga ag ginbo-oe ro bag it anang unga nga ginatantiya nga may sueod nga kapin sa P5,000 ag daywang cellphone.
Owa sigon nanda napan-uhan ro pagpanakaw bangud sa hamuok ro andang tueog.
Gindugang pa kara nga maskin sanda hay nagakalisod kon paalin nga maresolba ro serye it mga panakawan bangud nga matapos nga madakpan ro mga pasaway nga mga inunga hay ginaturn-over sa Department of Social Welfare and Development ukon DSWD ag uman nga ginabalik sa mga ginikanan matapos nga ma-lektyuran.
Nasayuran nga maskin ro establisimento komersiyal nga ginapanag-iyahan it pamilya ni Barangay Captain Neil Candelario it Poblacion Kalibo hay nabiktima it mga manakaw, apang natigayon nga matumod ro pagkatawo it manakaw matapos nga gin-review ro andang CCTV camera ag nadakpan ro menor de edad sa follow-up operation.
