KALIBO, Aklan — Amat-amat ro pagahiwaton nga pagkakas sa sewer lines sa sueod it limang dag-un sa front beach nga sakop it 25+5 setback sa isla it Boracay.
Suno kay Community Environment and Natural Resources Officer (CENRO)-Boracay chief Atty. Richard Favila kasunod raya it direktiba ni Environment Secretary Roy Cimatu nga kakason eon ro tanan nga sewer lines it Tourism Infrastructure and Enterprise Zone Authority (TIEZA) ag Boracay Island Water Company (BIWC) maeapit sa bibi it isla agud mapamayad ro kalidad it tubi.
Engkaso sigon nga high tide ag habagat season, gina abot it tubi-dagat ro manholes ag sewer lines nga dahilan it kontaminasyon it tubi nga nagiging peligroso sa mga residente ag turista.
Mag eowas pa raya sa mga pasaway nga naga panag iya it establisimento nga iligal nga gina konekta ro sewer lines sa drainage systems nga mas pang nagpalala sa problema.
Samtang, gin kumbinyu ni Atty. Fabila ro Sangguniang Bayan it Malay nga magpasa it resolution para sa uman nga pagbukas it road networks nga paga butangan it bag-ong tubo it service providers para sa mga establisimento.
Nauna eon nga gin manduan ni Cimatu ro regional director it DENR Region 6 ag Environment Management Bureau (EMB)-6 nga hugot nga ipatuman sa tanan nga mga hotels ag resorts ag kaparehong establisimento sa front beach maghalin sa Station 1 hasta sa Station 3 nga may 50 nga kwarto pataas nga makaangkon it kaugalingong sewage treatment plants (STP) samtang, ro mga establisimento nga may 49 nga kwarto panaba hay posibling makaangkon it clustered STP ukon pwedeng may sariling STP.
Sa ibang lugar sa Boracay ro mga hotels ag resorts nga may 50 kwarto pataas hay required man nga makaangkon it kaugalingong STP.
