KALIBO, Aklan — Naka-eusot sa entrapment operation ro sangka eaeaki matapos nga matunugan ro plano it sangka babaye nga ipaaresto imaw sa mga kapulisan.
Suno sa panaysayon it tagreklamo nga owa eon nagpamitlang it pangaean nga makapilang beses imaw nga gintawagan it eaeaki nga gina-alegar nga nakabakae it anang gintakaw nga cellphone nga makipagkita kana agud nga makipaghieawas kabaylo it pagbalik it nasambit nga gadget, sa sangka Inn sa banwa it Kalibo.
Ginpahayag it suspek nga ginasugid nga residente it Oyo Torong St. nga ginbaligya kana it sangka unga ro cellphone.
Gin-insister sigon it babaye nga uman nga pagabak-eon ro anang cellphone, apang nagpamalibad ro suspek ag ginhambae nga ro kinahangean eamang nana nga obrahon hay makipag-sex kana agud nga maibalik ro nasambit nga gamit.
Bangud sa koeba nga nabatyagan, nag-report raya sa Kalibo Police Station agud nga madakpan ro suspek.
Napas-eawan sigon ro planong pag-aresto sa suspek bangud nga ko ulihi hay owa eon raya nagasabat sa anang mga tawag ag indi eon ma-kontak ro anang numero.
