Naagapan ro sangkiri eon lang nga pag-shutdown it gobyerno it Amerika matapos maipasa it US Congress ro budget deal.
Nauna eon nga gin-aprubahan it US House of Representatives ro nasambit nga bill sa botong 366-34 ag makataliwan ro sang oras hay gin-eagas it US Senate ro pagpasa kara sa botong 85-11 maskin nga eampas raya it tunga sa oras sa deadline kabie, adlaw it Sabado, Disyembre 21.
Sa idaeom it bag-ong spending plan, pagapaeawigon ro presenteng fiscal levels hasta it Marso 14, magatao it $110 billion para sa relief para mabuligan ro mga natural-disaster survivors ag aid farmers.
Apang, bukon it kaibahan sa ginpasa nga pondo ro demand ukon ginapangayo ni President-elect Donald Trump sa mga mamalidha nga taasa ro debt ceiling it federal government nga nagapakita it limitasyon it ikasarang ni Trump para manduan ro mga mamalidha halin sa anang kaugalingon mismong Partido.
Madumduman nga ulihing natabo ro government shutdown sa Amerika ko unang termino ni Trump ko 2019 nga nagbuhay it 35 diyas, ro pinakamahabang government shutdown sa kasaysayan it Amerika.
